काठमाडौं : अधिवक्ता तथा स्तम्भकारका रूपमा परिचित स्विकृति बराल अब गजलकारका रूपमा फरक परिचयका साथ पाठकमाझ आएकी छिन्।
उनले लामो समयदेखि लेखेका छिटफुट रूपमा लेखेका गजललाई एकीकृत गरी गजलसंग्रह ‘यात्रा’ बजारमा ल्याएकी छन्।
शमी साहित्य प्रतिष्ठानले प्रकाशनमा ल्याएको उक्त कृतिमा बरालले विभिन्न विषयवस्तुहरू समेटेकी छिन्।
८० वटा गजल समावेश कृतिबारे समालोचक डा. नेत्र एटम भन्छन् , ‘ स्विकृतिका गजलमा प्रेम र उदासी छ अनि अभिलाषा र प्रश्न छ। समर्पण र विद्रोह पनि उनका गजलले एकसाथ आत्मसाथ गरेका छन् । जुनै रुपमा रहे पनि यी गजलमा भावको प्रबल गहिराइ तथा जादुमय कलाको प्रभाव छ।’
मुखले बोल्न सकिएन, पत्रले क्यै गर्छ कि त
लेखेपछी पुन:हेर्छु सच्याउन पर्छ कि त।
गजलमा बरालले बाह्य रुपमा रहने काफियाको अनुप्रासका साथ अन्तरमा समेत मीठो संगीत भरेर उनले गजलमा प्रस्तुतीको नवीन उन्मेष र गरिमा दिएको एटमको भनाइ छ।
बराल गजलको संरचनामा वैयक्तिक स्वरलाई पगालेर एउटा नयाँ अभिव्ञ्जना दिन सफल भएको उनले बताए।
कैले कस्तो, कैले कस्तो, देखिएको मात्र न हो
जून सधैं पूर्ण हुन्छ, छेकिएको मात्र न हो।
यस्तै लेखक बरालले आफूले गजल नै किन लेखेँ भन्ने कुरा आफैंलाई थाहा नभएको बताइन। उनले गजल भनेर नलेखे पनि जे लेखियो ती गजल भएको उल्लेख गरिन्।
उनले गजल संरचना र भावपूर्ण हुनुपर्ने भन्दै गजल वाचन गर्दा सुन्नेको मुखबाट स्वत: स्फूर्त रुपमा वाह! आउँछ भने त्यो गजल आफैँमा उत्कृष्ट गजल रहेको बताइन।
फूल टिप्ने , काँडा बिझे झिक्दै जाने हो
जे सिकाउँछ जिन्दगीले सिक्दै जाने हो।
बहरमा गजल लेख्नेहरूलाई उच्च सम्मान गर्दै र मुलत आक्षरिक छन्दमा गजल लेख्नेहरूको अनुशरण गर्दै आफूले पहिलो गजल संग्रह प्रकाशित गरेको उनले बताइन।
लामो समयदेखि कानुनसम्बन्धी स्तम्भकारका रुपमा सक्रिय बराल निबन्ध, कविता र गीतहरू लेख्दै र प्रकाशित गर्दै आएकी छन्।
