आशिष संवाददाता, १७ मंसिर, २०८० काठमाण्डौ l नेपाल राष्ट्रिय मण्डली सङ्गति (एनसिएफ नेपाल) तथा नेपाल ख्रीष्टियन समाज (एनसिएस) द्वारा संयुक्तरूपमा एक कार्यक्रमका साथ् आज ललितपुरमा नेपाल राष्ट्रिय ख्रीष्टियन सल्लाहकार परिषद (National Christian Advisory Council of Nepal) को घोषणा गरेका छन् l
नेपाल राष्ट्रिय मण्डली सङ्गति (एनसिएफ नेपाल) का तर्फबाट रेभ. हनोक तामाङ र नेपाल ख्रीष्टियन समाज (एनसिएस)को तर्फबाट रेभ. ओम प्रकाश सुब्बा दुवै जनाले संयुक्त रुपमा नेपाल राष्ट्रिय ख्रीष्टियन सल्लाहकार परिषद (National Christian Advisory Council of Nepal) घोषणा गर्नुभएको हो l
वर्तमान समयमा पनि प्रभुका जनहरूले के के गर्ने वा नगर्ने भन्ने विषयमा आवश्यक मार्ग निर्देशन दिन र हरेकले परमेश्वरको वचन बाइबलअनुसारको जीवन यापन गर्नका लागि सरसल्लाह, परामर्श दिन परिषद्कोे आवश्यकता महसुस गरी नेपाल राष्ट्रिय ख्रीष्टियन सल्लाहकार परिषद्कोे स्थापना गरिएको परिषदले जनाएका छन् l कार्यक्रममा बोल्नुहुँदै एनसिएस नेपालका महासचिव रेभ. डिल्ली राम पौडेलले आफूहरूले विगत देखि नै मण्डलीको हितको लागि कसरि अगाडी बढ्ने भनि निरन्तर छलफल गर्दै आएको र त्यसैको परिणाम स्वरूप आज परिषद घोषणा भएको बताउनु भयो l उहाँका अनुसार नेपाल राष्ट्रिय ख्रीष्टियन सल्लाहकार परिषदले विगत ५ वर्ष देखि नै नेपाली ख्रीष्टियन समुदायमा काम गर्दै आइरहेको समेत बताउनु भयो l कार्यक्रममा समाजका गण्डकी प्रदेश अध्यक्ष रेभ. के. पी त्रिपाठीले सो परिषदको लागि शुभकामना मन्तव्य राख्नु भएको थियो l
सो कार्यक्रममा डा. सिमोन पाण्डेले प्रार्थना गर्नु भएको थियो भने रेभ. डा. ओम प्रकाश सुब्बाले वचनको सेवा गर्नु भएको थियो भने परिषदको लागि रेभ. अब्दियल मुखियाले प्रार्थना गर्नु भएको थियो l त्यस्तै, पास्टर, राजेन्द्र मल्लले स्वागत मन्तव्य राख्नु भएको थियो भने रेभ. डिल्ली राम पौडेलले धन्यवाद ज्ञापन र रेभ. सामुयल सोदेम्बाले आशिर्वादको प्रार्थना गर्नुभएको थियो l
नेपालमा राष्ट्र्रिय तहमा कार्यरत नेपाल राष्ट्र्रिय मण्डली सङ्गति, नेपाल ख्रीष्टियन समाज तथा अन्य समुहहरूको निम्ति अविभावकीय भूमिका निर्वाह गर्ने, नेपाली मण्डली तथा ख्रीष्टियन संघ-संस्थाहरूबिच आपसी सद्भाव, मिलाप र एकता कायम राख्नमा बाधा ल्याउन सक्ने तत्कालीन समस्याहरूका विषयमा आवश्यक अध्ययन-अनुसन्धान गरी सरसल्लाह र अनुशासन कायम राख्न आवश्यक निर्देशन दिने, नेपाली मण्डलीको एउटै आवाज र धारणा बनाइराख्नुपर्ने अवस्थामा प्रभावकारी नेतृत्वदायी विचार प्रवाह गर्ने साथै समुदायमा आइलाग्ने विदास्पद शिक्षा तथा अभ्यासका बारेमा बाइबलीय दृष्टिकोण स्थापित गराउन नेतृत्व प्रदान गर्ने, ख्रीष्टियन संघ-संस्थाहरूका बिचमा समन्वयकारी भूमिका निर्वाह गर्ने, झुटा शिक्षाको प्रभावलाई निरुत्साहित गर्नका लागि आवश्यक पहलकदमी गर्ने, राष्ट्र्रिय तथा अन्तर्राष्ट्र्रिय क्षेत्रमा ख्रीष्टियनहरूको प्रतिनिधित्व गर्नका लागि सिफारिस गर्ने, नेपाल राष्ट्रिय मण्डली सङ्गति तथा नेपाल ख्रीष्टियन समाजबिच २०७५ सालमा गरिएको दश बुँदे सहमति पूर्ण रूपमा पालन गर्न र आ-आफ्ना संस्थाका उद्देश्यहरू अनुरूप नेपाली मण्डलीहरूका हकहितका पक्षमा काम गर्न समय समयमा उत्साह दिने र सचेत गराउने लगायतका उद्धेश्यहरू नेपाल राष्ट्रिय ख्रीष्टियन सल्लाहकार परिषद रहने छन् l
त्यस्तै गरि, परिषद्कोे गठनका निम्ति एक संयोजकसहित कम्तीमा २१ देखि बढीमा ३५ सदस्यहरू रहेको एक सल्लाहकार परिषद् गठन गरिने र स्थानीय मण्डलीमा पास्टरीय सेवाका लागि अभिषेक भई कम्तीमा २५ वर्ष वा अन्य सामाजिक संघ-संस्थाहरूमा कम्तीमा २५ वर्ष निरन्तर सेवा गरेको व्यक्ति हुनपर्ने र उमेरको हदमा ५० वर्ष नाघेको र काम गर्न सक्ने अवस्थामा रहेको व्यक्ति हुनुपर्ने मापदण्ड तय गरिएको छ l
परिषद गठनका लागि नेपाल राष्ट्रिय मण्डली सङ्गति र नेपाल ख्रीष्टियन समाजको कार्यकारिणी समितिले सिफारिस गरी पठाएका व्यक्तिहरूको एक सल्लाहकार परिषद्’ गठन गरिने छ र यही प्रक्रिया अन्य समयमा पनि लागु हुने र त्यसपछि सोही सल्लाहकार परिषद्ले आवश्यकताअनुसार सदस्यहरूको मनोनयन गर्न सक्ने र मनोनित सदस्यहरूको निम्ति निजले प्रतिनिधित्व गर्ने मण्डली समूह, संस्था वा सम्प्रदायबाट स्वीकृत गराएर मात्र सो काम गरिने परिषदले जनाएका छन् l
त्यस्तै गरि, सल्लाहकार परिषद् सदस्यहरूमध्येबाट एक जनालाई ‘संयोजक’ र अर्कोलाई ‘सदस्य सचिव’ को जिम्मेवारी दिइने र परिषद्का संयोजक र सदस्य सचिवको जिम्मेवारीमा आलोपालो प्रक्रियाअनुसार एक कार्यकाल २ वर्षको हुने र सो कार्याकाल पूरा भएपछि लगातार सोही जिम्मेवारी लिन नपाउने व्यवस्था मिलाइने र परिषदमा नेपाल राष्ट्रिय मण्डली सङ्गति र नेपाल ख्रीष्टियन समाजका बहालवाला अध्यक्षहरू स्वतः पदेन सदस्य हुने छन् ।
