डिल्लीराम पौडेल: महासचिव- नेपाल ख्रीष्टियन समाज
ख्रीष्टियनहरूले यसलाई किन मनाउँछन्?
पेन्तिकोस इस्टर पछिको सातौं आइतवारमा मनाइन्छ, जहाँ प्रेरितहरू र येशू ख्रीष्टका अन्य चेलाहरूमाथि पवित्र आत्माको आशीष खन्याइएको थियो र ख्रीष्टियन चर्चमा पेन्तिकोसको दिनलाई पवित्र आत्मा प्रेरितहरूमा अवतरण हुनुभएको दिन भनेर चिनिन्छ। पत्रुसको प्रचारबाट निर्देशित भएर यरूशलेममा हजारौं मानिसहरू परिवर्तन भएका थिए।
यस बर्षको पेन्तिकोस २०२३, मे २८ आइतबार, अर्थात् ईस्टर आइतबार (अप्रिल ९) को सात हप्ता पछि हुनेछ। तर प्रेरित २ मा नयाँ करारको पहिलो चर्चको सुरुआत र चर्चमा पवित्र आत्माको उपस्थिति हुनुभई उहाँद्वारा चेलाहरु सुसमाचारको लागि सशक्तिकरण भएको दिन मानिन्छ। येशू स्वर्गमा जानुभएपछि, येशूका चेलाहरू फसलको वा पेन्तिकोसको चाड मान्नको लागि एकसाथ भेला भएका थिए, र पवित्र आत्माले “उनीहरू बसेको सम्पूर्ण घर भरिदिनुभयो” (प्रेरित २:२)। “अनि तिनीहरू सबैजना पवित्र आत्माले भरिए र पवित्र आत्माले तिनीहरूलाई दिनुभएको उच्चारणबमोजिम तिनीहरू अन्य भाषाहरूमा बोल्न थाले” (प्रेरित २:४)।
यो असामान्य घटनाले ठूलो भीडलाई आकर्षित गर्यो, र पत्रुस उनीहरूसँग पश्चात्ताप र ख्रीष्टको सुसमाचारको बारेमा कुरा गर्न खडा भए (प्रेरित २:१४)। पवित्र आत्मा आउनुभएको दिनको अन्त्यमा चर्चमा ३,००० जति मानिसहरू थपिए (प्रेरित २:४१)। यही कारणले गर्दा ख्रीष्टियनहरूले अझै पनि पेन्तिकोस मनाउँछन्।
सबैले यसलाई प्रार्थना र सुसमचारको दिन मनाएर प्रार्थना र सुसमाचार सुनाउने चलन छ। सोही दिन NCS ले बिगत केहि बर्षदेखि ३-५ बजे जूममा राष्ट्रिय प्रार्थना दिवस मनाउदै आएकोमा त्यसमा सहभागी हुन हार्दिक आह्वान गर्दछौं।
