कोरोना भाइरस वा कोभिड-१९ को असर सारा विश्वमा लामो समयदेखि परिरहेको छ । यो भाइरसको सुरु कहाँ भयो भन्ने बारेमा अझै स्पष्टता छैन र चीनको उहान सहरबाट सुरु भएको हो भनी विश्वास गरिन्छ । सम्पूर्ण विश्वलाई नै यसले आत्मिक‚ सामाजिक‚ मानसिक‚ भौतिक‚ शैक्षिक र आर्थिक क्षेत्रमा अति नै ठूलो नकारात्मक असर पारेको छ ।
चर्च सेवाहरू पनि कोरोनाको कारण एकाध सुरु भएका भए पनि अझ ढुक्क भएर खुल्न सकेका छैनन् । आजसम्म विद्यालय र कलेजहरू पनि राम्रोसँग खोल्ने अवस्था अझ सृजना भएको छैन । कोरोनाको कारण जीवन सामान्य रूपमा सञ्चालन भइरहेको छैन ।
कोरोनाको असरको कारण समाजमा र देशमा ठूलो डर पैदा भयो र भइरहेको छ । लामो समयसम्म नेपाल लगायत विश्वमा मानिसहरू लकडाउनमा बस्न बाध्य हुनुपर्यो र अझै कतिपय देशहरूमा लकडाउन भइरहेको छ ।
कोरोनाको कारण विश्वमा धेरै व्यक्तिहरूको मृत्यु पनि भइरहेको छ । यस्तो अवस्थामा समाजमा भएका विभिन्न चुनौतीहरूलाई चर्चले कसरी सम्बोधन गर्न सक्छ त ?
चर्च समाजको निम्ति ज्योति र नुन हो । लकडाउनको समयमा चर्च लगायत धेरै संस्था‚ थियोलोजिकल कलेजहरूले पनि राहत वितरण गरेर समाजका विपन्न वर्गका व्यक्तिहरूलाई सहयोग गरेका उदाहरणहरू हामी सामु छन् । त्यसका साथसाथै समाजका मानिसहरूलाई आशा दिने कार्य पनि चर्चले गरेका छन् ।
महामारी भन्ने कुरा अहिले मात्र भएको होइन तर इतिहासमा धेरैपल्ट भएका छन् र हामीले धैर्य धारण गर्नुपर्छ भन्ने शिक्षा पनि मण्डलीले समाजलाई दिएको छ । परमेश्वर सार्वभौम हुनुहुन्छ र उहाँले यस महामारीलाई आफ्नो नियन्त्रणमा राख्नुहुन्छ भन्ने तथ्यलाई पनि मण्डलीले समाजमा सञ्चार गर्नुपर्छ । चर्च वा मण्डली भनेको आशाको केन्द्र हो र यसले जहिले पनि डर र त्रासमा भएका व्यक्तिहरूलाई जिउने उत्साह प्रदान गर्नुपर्छ ।
अन्त्यमा‚ परमेश्वरले चर्चलाई नेपालमा राख्नुभएको छ र यसले दिनसक्ने योगदान प्रशस्त छन् र धेरै मानिसहरूले ख्रीष्टियानहरूलाई गलत किसिमले बुझे पनि ख्रीष्टियानहरूले सबैका लागि भलाइ गर्न कहिल्यै रोकिनुहुन्न । ख्रीष्टका अनुयायीहरूको लक्ष्य नै सबैलाई सेवा गर्नु र आशा दिलाउनु हो ।
येशू उदाहरण हुनुभएका हुनाले हामीले उहाँबाट सिकेर सबैको हितका लागि सेवा गर्नुपर्छ । कठिन अवस्थाहरूमा सबैलाई आशा दिलाउने काम मण्डलीको हो । मेरो प्रार्थना यही छ कि कोभिड-१९ को त्रास छिट्टै सकिनेछ र हामी सामान्य जीवनमा फर्केर प्रभुको सेवा गर्नुको साथै समाजको परिवर्तनको सेवामा निरन्तर लागिरहनेछौँ । धन्यवाद ।
