काठमाडौं : गोलान हाइट्समा १२ बालबालिकाको ज्यान जाने गरी भएको आक्रमणले मध्यपूर्वी एसियालाई खतरनाक युद्धतर्फ धकेलेको छ।
शनिबार गोलान हाइट्समा फुटबल खेलिरहेका बालबालिकामाथि भएको रकेट आक्रमणमा लेबनानको हेजबुल्लाह समूहको संलग्नता रहेको आरोप इजरायलले लगाएको छ। अमेरिका भ्रमणमा रहेका इजरायली प्रधानमन्त्री बेन्जामिन नेतन्याहू तत्काल भ्रमण छोट्याएर इजरायल फर्किएका छन्। उनले हेजबुल्लाहसँग बदला लिने चेतावनी दिएका छन्।
साथै इजरायलको वार क्याबिनेट बैठकले हेजबुल्लाह समूहलाई जवाफ दिने निर्णय गरिसकेको छ। गाजामा आक्रमण सुरु भएदेखि नै हेजबुल्लाह र इजरायलबीच विवाद बढ्दै गएकोमा यसपटकको घटनाले युद्धलाई थप अनुमोदन गरिदिएको बीबीसीले उल्लेख गरेको छ।
योसँगै मध्यपूर्वका अरु देशसमेत सशंकित भएका छन्। टर्कीले इजरायलले लेबनानमा आक्रमण गरे आफ्नो सेना नरोकिने चेतावनी दिएको छ। टर्कीका राष्ट्रपति रिसेप तायिप एर्दोगानले एक टेलिभिजन सम्बोधनमा विगतमा आफ्नो सेनाले लिबियामा समेत हस्तक्षेप गरेको स्मरण गर्दै इजरायलविरुद्ध पनि जाने चेतावनी दिए।
उनको यो चेतावनीसँगै इजरायली अधिकारीहरुले जवाफी धम्की फर्काए। इजरायली विदेशमन्त्री इजरायल काट्जले एर्दोगान सद्धाम हुसेनको बाटोमा हिँड्न लागेको भन्दै सद्धाम हुसेनको अवस्था के भयो भन्ने थाहा पाउन चेतावनी दिए।
यस्तो शिलशिला जारी रहँदा मध्यपूर्वका अरु देशहरु पनि बाँडिएर विवादमा उत्रिने जोखिम बढेको एजेन्सीहरुले जनाएका छन्।
