शेर ए.सी
गत मंसिर ४ गते सम्पन्न आम निर्वाचनले सबभन्दा ठुलो पार्टी बनेको नेपाली कांग्रेस आगामी पाँच वर्षका लागि प्रतिपक्षमा बस्नुपर्ने अवस्थामा पुगेको छ । गएको निर्वाचनमा पाँच दलीय गठबन्धन गरेर अगाडि बढेका नेपाली कांग्रेस, माओवादी, एकिकृत समाजवादी लगायतका पार्टीहरूको गठबन्धन अन्ततः तोडिएको छ र नयाँ गठबन्धन सुरु भएको छ ।
आफू पहिलो चरणमा प्रधान मन्त्री हुनुपर्ने दावीका साथ गठबन्धनको बैठकमा प्रस्तुत भएका माओवादी केन्द्रका अध्यक्ष पुष्पकमल दाहाल “प्रचण्ड” नेपाली कांग्रेसले राष्ट्रपति र प्रधान मन्त्री नछोड्ने भएपछि उनले एकाएक युटर्न गरेर नेकपा एमाले लगायतका सात पार्टीसँग नयाँ गठबन्धन गरी राष्ट्रपति विद्यादेवी भण्डारीबाट प्रधान मन्त्री नियुक्त भएका छन् । उनको सपथ ग्रहण आज बेलुकी चार बजे हुने कार्यक्रम रहेको छ ।
आज यो स्थिति सृजना हुनुमा नेपाली कांग्रेसका सभापति शेरबहादुर देउवाको पदलोलुप नै हो भन्नेहरू धेरै छन् र अहिलेको अवस्थामा सबै घटनाक्रम हेर्दा त्यस्तै नै लाग्छ । नेपाली कांग्रेसले राष्ट्रपति र प्रधान मन्त्री दुवै पद छोड्न नचाहेकोले प्रचण्डलाई के.पी. अोलीको शरणमा जान र नयाँ गठबन्धन बनाउन बाध्य तुल्यायो ।
नेकापका अध्यक्ष के.पी. अोली अन्ततः नेपाली राजनीतिका चतुर खेलाडी साबित भएका छन् । आफूसँग सम्बन्ध तोडेर गएका प्रचण्ड, जसको कारण नेकपाको संघीय र प्रादेशिक सरकार ढलेको थियो भने गत निर्वाचनमा पनि ठुलाे घाटा लागेको थियो । त्यस कुराबाट रन्थनिएका ओलीले आखिर प्रचण्डलाई फकाउन सफल भएका छन् । यदि यसो गर्न नसकेको भए नेकपा एमालेले अझ धेरै घाटा बेहोर्नुपर्ने थियो ।
जे होस्, समयमा बुद्धि पुराएकाले अब केही समयका लागि थोरै भए पनि राहत मिल्ने देखिन्छ । तर समयमा सही निर्णय गर्न नसकेको र आफ्नो हट नछोडेकाले नेपाली कांग्रेसले संघ लगायत प्रदेशमा पाँच वर्षका लागि धेरै नै घाटा बेहोर्नुपर्ने भयो । यस घटनाले एकिकृत समाजवादलाई पनि तातो दुध निल्नु न ओकल्नु भएको छ । यही नयाँ गठबन्धनमा जाऊँ ओलीसँग कटाक्ष भइरहेको छ, नजाऊँ त्यसै त राष्ट्रिय पार्टी हुन नसकेर रन्थनिनु परेको अवस्था छ, अब त पार्टी नै समापनको बाटोतिर लाग्ला कि भन्ने डर!
को कसलाई के कस्तो फाइदा वा घाटा भयो त्यो त आगामी समयले बताउला तर नवनियुक्त प्रधान मन्त्री प्रचण्डलाई हार्दिक बधाई छ । यो गठबन्धन पाँच वर्षसम्म नै कायम रहोस् र देशमा राजनीतिक स्थिरता आओस्, यही हाम्रो शुभकामना छ ।
