३ पौष २०७९, गोविन्द विश्वकर्मा । गत बिहिबार नेपाली ख्रीष्टियन समुदायमा नै तहल्का मच्चाउनेगरी एक समाचार सार्वजनिक भयो । नेपाल ख्रीष्टियान समाज र नेपाल ख्रीष्टिय मण्डली संगतीको करिब २ वर्षे सर्वेक्षणका आधारमा नेपाली ख्रीष्टियन समुदायको अपत्यारीलो जनसंख्या सार्वजनिक गरियो । एनसिएस र एनसिएफका अनुसार नेपालमा जम्मा ७ हजार ७ सय ५८ मण्डली (चर्च) रहेको र कुल ६ लाख ८३ हजार ख्रीष्टियनहरुको जनसंख्या रहेको तथ्याङ्क सार्वजनिक गरिएको थियो ।
उक्त तथ्याङ्क सार्वजनिक भएको केहि समय नवित्दै तिब्र आलोचना भईरहेको छ । कतिपयले तथ्याङ्क सहि ढंगले संकलन नभएको भन्दै आधारहिन र अपूणर् भएको दाबी गर्दैछन् भने कतिपयले उक्त तथ्याङ्कले बास्तविक ख्रीष्टियन (पिता, पुत्र, पवित्र आत्मा) ख्रीष्टियन समुदायको मात्र जनसंख्या समेटेको बताईरहेका छन् ।
सामाजिक सञ्जालहरुमा अधिकांशले उक्त तथ्याङ्क संकलन गर्दा धेरै त्रुटि भएको, आफुहरुकहाँ कहिले, कोहिपनि गणक नआएकोले हचुवाको भरमा तथ्याङ्क संकलन गरिएको बताईरहेका छन् ।
बिबाद किन ?
वास्तवमा विगत एक दशकदेखि नेपाली ख्रीष्टियन समुदायले नेपालभरी ख्रीष्टियन समुदायको जनसंख्या ३० लाख भन्दा बढी अर्थात कुल जनसंख्याको १० प्रतिशत भनेर बुझिरहेका थिए । विशेषगरी राष्ट्रिय ख्रीष्टियन महासंघ नेपालले लामो समयदेखि उक्त तथ्याङ्क ठोकुवाको साथ दावि गरिरहेको थियो । महासंघका अध्यक्ष सी.बी. गहतराजले विभिन्न राष्ट्रिय सञ्चारमाध्यमहरुमा दिने आफ्ना अभिव्यक्तिमा नेपालभरी १४ हजार भन्दा बढि चर्च भएको र ३० लाख भन्दा बढि ख्रीष्टियनहरुको जनसंख्या रहेको दाबी गर्दै आएका थिए । तर पछिल्लो समय सार्वजनिक भएको उक्त झिनो तथ्याङ्कले राष्ट्रिय ख्रीष्टियन महासंघ नेपाललाई झुठ सावित गरिदिएको छ ।
यता उक्त आंकडा सार्वजनिक भएको एक दिन पछि नै महासंघले प्रेस विज्ञप्ती सार्वजनिक गर्दै सार्वजनिक भएको तथ्याङ्क आधारहिन, तथ्यहिन र भ्रमपूणर् भएको बताएको छ । महासंघले आफुहरुले राज्यसँग सहकार्य गर्दै सर्वेक्षरण गरिरहेको र आफ्नो ठोस तथ्याङ्क छिटै सार्वजनिक गर्ने विज्ञप्तीमा उल्लेख गरिएको छ ।
राज्यसँग निरन्तर ख्रीष्टियनहरुको मुद्दाहरुलाई लिई पैरवीको काम गरिरहेको राष्ट्रिय ख्रीष्टियन महासंघ नेपालले ख्रीष्टियनहरुको जनसंख्या ३० लाख भन्दा बढी र चर्चको संख्या १४ हजार भन्दा बढी रहेको स्पट पारेको छ । आफुहरुले छिट्टै ठोस जनसंख्या सार्वजनिक गर्ने महासंघका अध्यक्ष सी.बी. गहतराजले नयाँपाना न्युजलाई बताएका छन् ।
एनसिएफ, एनसिएस र एफएनसिएनबिचको कार्यगत एकता धरमराउँदै
पछिल्लो समय सार्वजनिक भएको तथ्याङ्कका कारण राष्ट्रिय ख्रीष्टियन महासंघ नेपाल, नेपाल ख्रीष्टियान समाज र नेपाल ख्रीष्टिय मण्डली संगतीबिचको कार्यगत एकता धरमराउदो अवस्थामा पुगेको छ । इसाई जगतका चर्चित यी संस्थाहरुले करिब एक वर्ष अघि ७ वटा बुँदामा हस्ताक्षर गर्दै कार्यगत एकता गरेका थिए । तर बर्षदिन नबित्दै ख्रीष्टियन समुदायलाई मेलमिलाप र भाइचारकाको पाठ सिकाउने उद्देश्यले गरिएको एकता भंग हुने संघारमा पुगेको छ ।
कतिपय पक्षले राष्ट्रिय ख्रीष्टियन महासंघभित्र देखिएको आन्तरिक बिबादका कारण एनसिएस र एनसिएफ एक धु्रब तिर लागेर महासंघलाई एक्लो बनाएको दावी गरीरहेका छन भने कतिले महासंघले कार्यगत एकताको व्यवास्था गरि मनपरि गरेको बताइरहेका छन् । हाल नयाँ तथ्याङ्क सार्वजनिक गरेको एनसिए र एनसिएससँग महासंघ रुष्ठ हुनुले एकता विभाजन हुने प्रष्ट संकेत देखिएको छ ।
लेखकबाट:
आखिर जे जस्तो भएपनि आन्तरिक सहमति, सहकार्य र थप गृहकार्य गरी जनसंख्या सार्वजनिक गरिनुपर्ने थियो । यसरी ख्रीष्टियन समुदायको अधिकार र पहिचानका लागि स्थापना भएका संस्थाहरु विभाजित भई आफुखुसी समुदायलाई अन्यौलमा पार्नु यथोचित पक्कैपनि होईन ।
