आशिष संवाददाता, भदौ २३, २०७९ काठमाडौं । पछिल्लोसमय एकपछि अर्को विवादमा मुछिदै पार्टी नै फुटको संघारमा पुगेकोबेला आफ्नो सबै विवाद मिलाएर अघि बढेको सामाजिक एकता पार्टीले पत्रकार सम्मेलन मार्फत जनाएको हो । हिजो पार्टीको केन्द्रीय कार्यकारिणी समिति तथा प्रदेश र जिल्ला अध्यक्षहरुको संयुक्त बैठक पश्चात आफुहरुको सबै आन्तरिक विवाद समाधान भई सहमतिमा आएको पार्टीका अध्यक्ष सी.बी. गहतराजले बताए ।
अध्यक्ष गहतराजले आर्थिक अपचलन गरेको, पार्टीमा एकल निणर्य लिएको लगायतका कारण देखाउदै पार्टी भित्रकै इतर समूहले अध्यक्षप्रति असन्तुष्टि जनाउंदै अध्यक्षलाई निलम्बन गरेका थिए । अध्यक्ष गहतराजले गैंडाकोटको ग्रेस चर्चलाई जग्गा उपलब्ध गराएपश्चात उक्त समूह केही लचिलो देखिएको थियो । निरन्तरको छलफल र आपसी समझदारी पश्चात हिजो बुधबार एक कार्यक्रमका विच अध्यक्ष गहतराजलाई गरिएको कारवाही फिर्ता लिएको पार्टीका वरिष्ट उपाध्यक्ष प्रेम बहादूर कार्कीले बताए ।
कार्यक्रममा आफुहरुले अध्यक्ष सी.बी. गहतराज विरुद्ध निर्वाचन आयोगमा दिएको निवेदन फिर्ता लिएको विषयमा बोल्दै पार्टीका उपाध्यक्ष चन्द्रमाया श्रेष्ठले भन्नुभयो “सामाजिक एकता पार्टीमा केही आन्तरिक कुराका कारण फाटो आएको थियो तर सबै प्रकारका असमझदारी हटेको छ । दुवै पक्षले जितेका छौँ ।” उहाँले जोड्नुभयो “ हामीले विगतका सबैकुरा भुलेका छौँ । आज बहस भयो, आन्तरिक छलफल भयो र अब देखि सबैले सबैलाई सम्मान गर्नेछौँ । व्यक्तिगत मामलालाई संस्थागत गरि पार्टीलाई हानी पुर्याउने कुनै पनि किसिमको क्रियाकलाप नगर्ने र नगर्नहुन आग्रह गर्दछु ।”
अध्यक्ष सी.बी. गहतराजले आफुहरुलाई कुनै शक्तिले पनि फुटाउन नसक्ने बताए । “हामी देशको भविष्य निर्माण गर्न हिडेका छौं, हाम्रो लक्ष्यमा पुग्नलाई यी सानातिना कुराहरु विर्सेर अघि बढ्नु जरुरी छ ।” उनले भने “आगामी निर्वाचनमा अब कम्मर कसेर अघि बढ्नुपर्छ । यी बिचमा मलाई व्यक्तिगत रुपमा बदनाम गराउन केही तत्वको खेल थियो तर सबै परास्त भएको छ ।”
सामाजिक एकता पार्टी आसन्न संघ र प्रदेशको निर्वाचनमा देशैभर डिएसए गठबन्धन मार्फत चुनावमा होमिने तयारीमा रहेको छ ।
