१ असोज, काठमाडौं । एमालेको रोचक पक्ष– यसका अध्यक्ष केपी शर्मा ओली जुन घरमा बस्छन्, त्यही घरमा उनलाई पार्टीको नेतृत्वबाट हटाउने एजेन्डामा बैठक चल्नेगर्छ ।
र, त्यो बैठक आज बिहीबार पनि जारी छ । उपाध्यक्ष रामबहादुर थापा बादल, विष्णु पौडेल, महासचिव शंकर पोखरेल, नेताहरु प्रदीप ज्ञवाली, पृथ्वी सुब्बा गुरुङ, भानुभक्त ढकाल, विष्णु रिमाल लगायत त्यो बैठकमा सामेल छन् ।
ओलीसँग निकट रहेका उपाध्यक्ष थापाले यसअघि नै गुन्डुमा बैठक राख्न प्रस्ताव गर्दा केही नेताहरु मानेका थिएनन् । तर ओलीको स्वास्थ्य लगायत कारण देखाएर उनीहरु फेरि गुन्डु पुगेका छन् ।
पार्टी स्रोतका अनुसार अध्यक्ष ओलीले पार्टी पुनर्गठनका लगभग सबैजसो एजेन्डामा सहमति जनाउने संकेत गरे पनि नेतृत्व नछाड्ने स्पष्ट गरेका छन् ।
