काठमाडौँ : निर्वाचन आयोगले राष्ट्रियसभा निर्वाचनका लागि ७ वटा मतदान स्थल र १४ वटा मतदान केन्द्र तोकेको छ।
आयोगले निर्वाचनका लागि प्रत्येक प्रदेशमा १/१ वटा मतदान स्थल र सोही मतदान स्थलमा २/२ वटा मतदान केन्द्र रहने गरी जम्मा ७ मतदान स्थल र १४ मतदान केन्द्र तोकेको हो।
आयोगका सहसचिव एवम् प्रवक्ता शालिग्राम शर्मा पौडेलले कोशी प्रदेशका लागि प्रदेश निर्वाचन कार्यालय विराटनगर, मोरङ र मधेश प्रदेशका लागि महेन्द्रनारायण निधि मिथिला संस्कृति केन्द्र जनकपुरधाम, धनुषालाई मतदानस्थल तोकिएको जानकारी दिए।
यसैगरी, बागमती प्रदेशका लागि मकवानपुरको हेटौँडास्थित भुटनदेवी मावि प्राविधिक शिक्षालयको ब्लक ‘F’ प्राविधिक भवन, गण्डकी प्रदेशका लागि कास्कीको पोखरास्थित प्रदेश निर्वाचन कार्यालय, लुम्बिनी प्रदेशका लागि दाङको घोराहीस्थित कर्मचारी मिलन केन्द्रको भवन, कर्णाली प्रदेशका लागि सुर्खेतस्थित प्रदेश निर्वाचन कार्यालय र सुदूरपश्चिम प्रदेशका लागि कैलालीको धनगढीस्थित प्रदेशसभा भवनलाई मतदानस्थल तोकिएको छ।
तोकिएका मतदानस्थलमा प्रदेशसभाका सदस्यले मतदान गर्न र गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुखले मतदान गर्नका लागि बेग्लाबेग्लै मतदान केन्द्रहरू रहनेछन्। मतदान केन्द्रको विवरण आयोगको वेबसाइटमा समेत प्रकाशन गरिएको छ।
प्रवक्ता पौडेलका अनुसार तोकिएका मतदान केन्द्रमा माघ ११ गते विहान ९ बजेदेखि दिउँसो ३ बजेसम्म मतदान हुनेछ।
