केपी अधिकारी

फिलाडेल्फिया चर्च , भैंसेपाटी , ललितपुर

आज भोलि हाम्रो समाजमा प्राय: काममा व्यस्त रहने मानिसहरूले  हप्ताभरि काम गर्नुहुन्छ । सबैमा शुक्रबार आउने बित्तिकै एक किसिमको तरंगको पैदा हुने गरेको देखिन्छ: आज त शुक्रबार, भोलि शनिवार त छुट्टी । ल है साथीहरू, आज गुड फ्राइडे कसको र कुन स्थानमा मनाउने“ भन्ने चलन अनि सो अनुसार शुक्रबार राती अबेरसम्म पनि साथी, आफन्त, अफिसका सहकर्मी आदिसँग रमाउने अनि आनन्द गर्ने चलन एक प्रकारले समाजका सबै वर्गका मानिसहरूमा देखिन्छ I यो एक किसिमको कामको प्रेसरको साप्ताहिक थकानको आराम र विश्राम अनि फुर्सतको समयको व्यक्त वाक्यांश बनेको छ “गुड फ्राइडे” I अनि यस्ता शुक्रबारहरू वर्षमा ५२ वटा आउने र हरेक शुक्रबारलाई गुड फ्राइडे भन्ने सामान्य सोच र अभ्यास भइ नै रहेको छ र रही नै  रहनेछ I

तर हामी इसाईहरूका लागि असल शुक्रबार एउटा मात्र हो र त्यो शुक्रबारका दिन ख्रीष्ट येशू हामी मानव जातिको सबै पापहरूको सट्टा आफैं क्रूसमा बलिदान हुनुभयो र हामीले अब हाम्रा पापको लागि कुनै सजाय भोग्नु पर्नेछैनI उहाँको बलिदानका कारण हामी आज हामी स्वतन्त्र रूपमा जिउन सक्ने ख्रीष्टको राज्यका नागरिक भएका छौं I त्यसकारण हाम्रा निम्ति असल शुक्रबार अथवा गुड फ्राइडे विशेष महत्वको रहेको छ, जुन साधारण समाजको सोचबाट धेरै माथि छ I हाम्रा मुक्तिदाता येशू ख्रीष्टले हाम्रै निम्ति कलवरी क्रूसमा आफ्नो यात्रा गर्दा बोल्नुभएका सात वाणीहरूले हाम्रो जीवनमा धेरै फरक पारेको छ अनि हाम्रो सबै पीडाको अन्त्य भएको छ I यस अर्थमा ख्रीष्टको क्रूसको यात्रा र जीवन बलिदानले हामीलाई मानवको उच्च संघारमा पुर्याएको र हामीले जीवनको भोगाई र ठम्याईलाई नजिकबाट नियाल्ने गरी येशूका वाणीहरूले प्रमाणित गरेका छन् I

ख्रीष्ट येशूको वाणी /सन्देशबाट हामीले जीवनमा नजानी नहुने सात कुराहरू:

• हामीले बिना शर्त सबैलाई क्षमा दिनुपर्छ (लूका २३:३४ )
• हामीले आफ्ना पापबाट छुटकारा पाई सकेका छौं  (लूका २३: ४३ )
• हामीले आफ्नो जिम्मेवारी र कर्तव्यलाई भुल्नुहुँदैन (यूहन्ना १९:२६-२७)
• हामी आफ्नो पापसँग बिछोड हुनै पर्छ (मत्ती २७:४६ )
• हामी ख्रीष्टमा तृष्णा जाग्ने बन्नु पर्दछ (यूहन्ना १९:२८)
• हामी संसारका लेखि  मरेको हुनु पर्दछ (यूहन्ना १९:३०)
• हामीले हाम्रो सम्पूर्ण जीवन परमेश्वरमा समर्पण गर्नु पर्दछ (लूका २३:४६)

शुक्रबारका दिन ख्रीष्टले आफ्नो देह त्याग गर्नुभयो र उहाँ शनिबारको दिनमा चिहानमा रहनुभयो I यो  मृत्यु मानिसले मर्नै पर्ने कुरा उहाँले आफैले प्रमाणित गरी संसारलाई देखाउनुभएको छ I जसका कारण हाम्रो मृत्यु अब रहेन र हामी साँच्चिकै आनन्दित भएका छौँ र आज स्वतन्त्र पनि बनेका छौं I हामी भन्न सक्छौं कि हामी ह्यापी-असल शुक्रबार वा गुड फ्राइडे I

त्यसै गरी “ईस्टर सन्डे” ले पनि हामीलाई धेरै कुरा सिक्ने मौका दिएको छ र यो दिनलाई हामी मृत्युमाथिको विजयको दिन पनि भनेर मनाउन सक्छौं I

त्यसै गरी ईस्टर सन्डे पनि हाम्रो निम्ति अति नै महत्त्वपूर्ण घडी हो, जुन दिनमा ख्रीष्ट येशूले मृत्युलाई निल्नुभयो र जीवनमा पुनरुत्थान हुनुभयो I अब मृत्युको राज्य खारेज/समाप्त भई जीवनको राज्य प्रभुले हामीलाई दिनुभएको छ I

पवित्रशास्त्रले हामीलाई विभिन्न तरिकाबाट ईस्टरको महत्त्व बारे प्रष्ट गरेको छ, जसलाई हामीले सजिलै बुझ्न र अरुलाई पनि बुझाउन सक्छौं I

• हामीलाई थाहा छ कि हाम्रा प्रभु येशू जीवित हुनुहुन्छ (हिजो, आज अनि भोलि), जसको  हामी सेवा गर्छौं (प्रकाश १:८, हिब्रू १२:२२)
• हामीलाई थाहा छ कि हाम्रा परमेश्वर सत्य हुनुहुन्छ (यर्मिया १०:१०, गन्ती २३:१९, हिब्रू ६:१८)
• हामीलाई थाहा छ, हाम्रो मुक्ति निश्चित छ (रोमी १५:१७-१८, हिब्रू ७:२४-२५)
• हामीलाई थाहा छ, हामीले अनन्त जीवन पाएका छौं (रोमी ६:२३, तीतस २:२४)
• हामीले पापमाथि विजय पाएका छौं (१ पत्रुस २:२४, रोमी ६:१४)
• हामीले हाम्रो सबै कुराहरू परमेश्वरको महिमाको निम्ति चलाउने छौं (कलस्सी १:२७)
• हाम्रो आशा र जीवनको अनन्तता परमेश्वरमा लुकाइएको छ (१ कोरिन्थी १५:२१-२३ )

हामी हाम्रो सोच र हामी रहेको समाजको भोगाइ, गराइ र तरिकाभन्दा पनि परमेश्वरले निर्दिष्ट गर्नुभएको स्वर्गीय अनि सो अनुसारको फरक तरिकाबाट यस वर्षको “गुड फ्राइडे र ईस्टर सन्डे”  बाइबलीय आधारमा मनन गर्न र  मनाउन सकौं (देशको परिस्थिति र माहोल अनुरूप) ।

यसै अवसरमा सबैलाई शुभकामना पनि !