रौतहट : रौतहटमा एचआइभी एड्स संक्रमितको संख्या बढ्दै गएको एक तथ्याङ्कले बताएका छन्। गत आर्थिक वर्षमा जिल्लाको १८ स्थानीय तहमा कुल संक्रमितको संख्या ४७४ पुगेको हो।
त्यस अघिको आर्थिक बर्ष २०७९/०८० मा एचआइभी एड्स संक्रमितको संख्या मात्र ३३२ रहेको थियो। एक बर्षको अवधिमा जिल्लाभरीमा १४२ जना एचआइभी एड्स संक्रमित बढेको संक्रमितहरूको रोकथाम तथा सचेतना सम्बन्धी काम गर्दै आएको सप्तरंगी नेपाल चन्द्रनिगाहपुरकी संयोजक जिना राना मगरले बताइन्।
सबैभन्दा बढी राजपुर नगरपालिकामा एचआइभी एड्स संक्रमित देखिएको छ। राजपुरमा ६३ जना संक्रमित रहेको संयोजक मगरले बताइन्। दोश्रोमा इशनाथ नगरपालिकामा अहिले सम्म ५२ जना संक्रमित रहेका छन।
चन्द्रपुर नगरपालिकामा अहिले सम्म ३७ जना संक्रमित रहेका छन्। यसैगरी गौर नगरपालिकामा ३५ , गुजरामा २० जना,फतुवा बिजयपुरमा १० ,कटहरियामा २० ,बृन्दावनमा १०,गढीमाइमा ११ जना संक्रमित रहेका छन्।
यस्तै माधव नारायण नगरपालिकामा १२ ,गरुडामा १९ ,देवाही गोनाहिमा २० ,मौलापुरमा १५ ,बौधीमाइ मा २० ,परोहामा २५ ,राजदेवी नगरपालिकामा २५ र यमुनामाइ २१ ,दुर्गाभगवती गाउँपालिकामा २० जना तथा अन्य ३४ जना गरी रौतहटमा ४ सय ७४ जना संक्रमित रहेका छन्।
२०७१ साल यता जिल्लामा एचआइभी एड्स रोगको कारण ४२ जनाको मृत्यु भएको प्रादेशिक अस्पताल गौरका एचआइभी एड्स शाखाका प्रमुख शेष असरफ अलीले जानकारी दिए।
एचआइभी एड्स संक्रमितको उपचार सहज भएकाले रोग लागेको शंका लागेमा समयमै उपचार गर्न अस्पतालमा आउन सकेमा अनाहक मृत्यु बाट जोगिनसक्ने डाक्टर ठाकुरले जानकारी दिए।
जिल्लाको दक्षिणीभेग भारतीय सीमामा संग जोडिएको राजपुर, ईशनाथ नगरपालिकाका अधिकांश युवाहरू रोजगारीको लागि भारतको कलकता, मुम्बई, दिल्ली लगायतका सहरहरूमा जानेगरेको र उक्त भारतीय सहरहरूमा खुल्ला वेश्यावृत्ति हुनेगरेको कारण एचआइभी संक्रमितको संख्या बढ्दै गएको जानकारहरूको ठम्याई रहेको छ।
