काठमाडौं : देशका विभिन्न स्थानमा भएका पछिल्ला सवारी दुर्घटनामा परी चार जनाको मृत्यु भएको छ।
चितवन, भरतपुर महानगरपालिका-१० बिशाल चोकमा काठमाडौंबाट काकरभिट्टातर्फ जाँदै गरेको प्रदेश १-०२-००२ ख ०३५३ नम्बरको बसको ठक्करबाट साइकलयात्री भरतपुर महानगरपालिका-११ भोजाड बस्ने ७२ वर्षीय खेमलाल अधिकारीको मंगलबार राति मृत्यु भएको छ।
ठक्करबाट गम्भीर घाइते भएका उनको नयाँ मेडिकल कलेज भरतपुरमा उपचारको क्रममा मृत्यु भएको हो। बस चालकलाई प्रहरीले नियन्त्रणमा लिएको जनाएको छ।
त्यस्तै, रामेछाप मन्थली नगरपालिका-७ कल्लेरीमा मन्थलीबाट पिङ्खुरीतर्फ जाँदै गरेको प्रदेश ३-०१-०२३ च ३९०९ नम्बरको बोलेरो गाडी अनियन्त्रित भई सडकबाट करिब २ सय मिटर तल खसेर मंगलबार बेलुकी दुर्घटना हुँदा बोलेरोमा सवार मन्थली नगरपालिका-७ कल्लेरी गणेशथान बस्ने ६५ वर्षीया माया विकको घटनास्थलमै मृत्यु भएको छ। साथै दुर्घटनामा घाइते भएका बोलेरो चालकको मन्थली अस्पताल रामेछापमा र बोलेरोमा सवार ९ जनाको राष्ट्रिय ट्रमा सेन्टर काठमाडौंमा उपचार भइरहेको प्रहरीले जनाएको छ।
त्यस्तै, रोल्पा रून्टिगढी गाउँपालिका-६ स्याला स्थित सडकमा रा.१ ख २१३१ नम्बरको मिनी ट्रक मंगलबार राति दुर्घटना हुँदा चालक रून्टिगढी गाउँपालिका-६ निगालपानी बस्ने ३२ वर्षीय महेश थापाको घटनास्थलमै मृत्यु भएको छ। साथै दुर्घटनामा घाइते भएका मिनी ट्रकमा सवार १ जनाको प्राथमिक स्वास्थ्य केन्द्र होलेरीमा उपचार भइरहेको प्रहरीले जनाएको छ।
त्यस्तै, मोरङ सुनवर्षी नगरपालिका-६ खिर्किडाँगी स्थित सडकमा झपडतलबाट खिर्किडाँगीतर्फ जाँदै गरेको को.१ प ६३४८ नम्बरको मोटरसाइकलको ठक्करबाट पैदलयात्री सोही ठाउँ बस्ने ५० वर्षीय सुरेन दासको मंगलबार राति मृत्यु भएको छ। ठक्करबाट गम्भीर घाइते भएका उनको रंगेली अस्पतालमा उपचारको क्रममा मृत्यु भएको हो। मोटरसाइकल चालकलाई प्रहरीले नियन्त्रणमा लिएको छ। दुर्घटनाका सम्बन्धमा प्रहरीले आवश्यक अनुसन्धान गरिरहेको जनाएको छ।
