२५ भदौ, काठमाडौं । नेपाली कांग्रेसकी सांसद गंगालक्ष्मी अवालले रसुवा बाढी प्रभावितको उद्धारमा खटिएका टोलीहरूलाई उद्धार सामग्री अभाव भएको बताएकी छन् ।
प्रतिनिधिसभाको बिहीबारको बैठकको आकस्मिक बैठकमा बोल्दै उनले उद्धारमा खटिएका टोलीहरूलाई उद्धार सामग्री अभाव भएको बताएकी हुन् ।
सांसद अवालले उद्धारमा खटिएका भक्तपुरका अरुण सैंजुले आफूलाई उद्धार सामग्रीको अभाव रहेको जानकारी दिएको पनि संसद् बैठकमा बताइन् ।
‘मलाई आज बिहान टिमुरेबाट रेस्क्यु टिममा रहेका भक्तपुरका अरुण सैंजु (आरएनए–१६ का) ले फोन गरेर रेस्क्यु इक्विपमेन्टहरू अभाव भएको मलाई जानकारी गराउनुभएको छ,’ उनले भनिन्, ‘अक्सिजन लेभल नाप्ने मिटर छैन भनिरहनुभएको छ । टर्चहरू छैन भनिरहनुभएको छ । डोरीहरू चुँडिएको कुरा भन्नुभएको छ ।’
सांसद अवालका अनुसार सैंजु १० भदौबाट रसुवा पुगेर सुरक्षाकर्मीहरूका साथ बाढी प्रभावितको उद्धार गर्दै आएका छन् । ‘तत्काल उक्त रेक्स्यु इक्विपमेन्टहरू उपलब्ध गराउन सरकारलाई आग्रह गर्न चाहन्छु,’ उनले भनिन् ।
उनले रसुवाको भोटेकोशी बाढीमा भक्तपुरका २५ जना सम्पर्कविहीन रहेको र एक जनाको मृत्यु भएको जानकारी जिल्ला प्रशासन कार्यालयबाट पाएको बताइन् ।
