१८ भदौ, काठमाडौं । सत्तारुढ रास्वपा सभापति रवि लामिछानेले विपद्को बेलामा राजनीतिक र राष्ट्रिय सहमति कायम राखेर जानुपर्नेमा जोड दिएका छन् ।
बिहीबार बसेको सचिवालय बैठकमा सभापति लामिछानेले उक्त कुरामा जोड दिएको रास्वपा प्रवक्ता जगदीश खरेलले जानकारी दिए ।
उनका अनुसार, सभापति लामिछानेले सर्वदलीय बैठकमा भएका छलफल र त्यसबाट निस्किएका निष्कर्षबारे पनि बैठकमा जानकारी गराएका थिए ।
‘खासगरी सर्वदलीय बैठकमा भएका छलफल, त्यसबाट निकालिएका निष्कर्षबारे पनि जानकारी गराउनुभयो,’ सभापति लामिछानेको भनाइ उद्धृत गर्दै प्रवक्ता खरेलले भने, ‘सर्वदलीय बैठकमा जुन ऐक्यबद्धता व्यक्त गरिएको छ । सभापति लामिछानेले उहाँहरू सबैलाई धन्यवाद दिनुभएको छ ।’
उनले बैठकबारे जानकारी गराउँदै थप स्पष्ट पारे, ‘हाम्रो राजनीतिक र राष्ट्रिय सहमति कायम गरेर जानुपर्छ भन्नेमा जोड दिनुभएको छ ।’
